Another copy-paste. Students conducted an anti-mining forum.

http://www.nordis.net/?p=10809

Anti-Mining Forum iti Ili a Vintar, Ilocos Norte

Written By: editors on October 16, 2011 No Comment

By DONNA RABANG PETA
www.nordis.net
LAOAG, ILOCOS NORTE – Maysa a forum kontra iti dadakkel ken makadadael a panagminas ti naisayangkat iti San Nicolas de Tolentino Roman Catholic Parish Church iti ili a Vintar, Ilocos Norte idi October 11, 2011.
“Ili mi a Vintar Aywanan daka,”dayta ti tema ti nasao a forum nga inorganisa ti Vintar Roman Catholic Church iti panangidaulo ni Rev. Fr. Hermogenes G. Saturnino Jr. ken School Director iti Saint Nicholas Academy of Vintar (SNA). Agarup dua gasut (200) ti nagatendar iti daytoy a forum manipud iti SNA, Pallas Integrated School, teachers ken principal dagiti dadduma pay nga eskuelaan iti Vintar, church representatives, mass media ken indibidual.
Maysa kadagiti kangrunaan a dimmar-ay iti daytoy a forum ket ni Hon. Ferdinand B. Mabanag, Vice Mayor iti Vintar kadua na dagiti walo nga Sangguniang Bayan, dagiti Sangguniang Kabataan ken representatibo dagiti nadumaduma a departamento ti gobyerno iti nasao nga ili.
Adda ti agarup innem nga aplikasyon iti panagminas iti ili a Vintar maibasar iti listaan ti Mines and Geosciences Bureau (MGB Region I), August 31, 2011. Iti agdama, aktibo ken napardas ti panagisayangkat ti Benguet Corporation ken National Commission on Indigenous Peoples (NCIP Ilocos Norte) iti Free, Prior and Informed Consent (FPIC) consultation kadagiti Indigenous Peoples iti Vintar ken iti amin a lugar a nasakop ti applikasyon da iti intero nga Ilocos Norte.
Nagserbi daytoy nga aktibidad a karit para kadagiti estudyante ken kabataan a timmabuno tapno aktibo da a makipaset iti panangipakaammo iti nalawlawa nga umili ken amin a sector iti ili da kadagiti gandat a panagminas iti ili a Vintar ken dadduma pay a luglugar iti Ilocos Norte. Kas nakuna ti guest speaker da manipud iti STOP Exploitation a dagiti naadal ken naamuan da manipud iti daytoy a forum ket isu iti balon dagiti estudyante ken kabataan tapno ipakaawat iti umili dagiti makadadael ken nakaru nga epekto ti panagminas iti komunidad ken aglawlaw ken agserbi met laeng daytoy a forum a pagadalan ken karit kadagiti amin nga upisyal iti Vintar tapno agaramid da iti resolusyon, petisyon ken saan da a palubusan dagitoy a gandat dagiti kumpanya ti panagminas.
Kinuna ni Rev. Fr. Hermogenes G. Saturnino Jr a kasapulan nga imula iti panunot dagiti narway nga umili nangruna kadagiti agtutubo iti negatibo nga epekto ti panagminas ken tapno maisagana da ti masakbayan da. “Naisayangkat daytoy a forum a mariing kadagiti agtutubo mainaig iti amin nga isyu iti pagilian kangrunaan iti isyu ti ekolohiya ken kasapulan iti aktibo a pannakipaset da kadagitoy nga aktibidad,” ni Father Saturnino.
Sakbay na nairekep ti programa, pinasengkedan dagiti agtutubo ken estudyante ti tema daytoy a forum babaen ti panangipukkaw da ti “Ili mi a Vintar Aywayan daka!” # nordis.net